Wadau wa habari Arusha walia na Muswada wa sheria ya vyombo vya habari kujiunga na TBC

ARUSHA

Na : Abdalla I. Wellah

Ikiwa bunge linasubiriwa kuanza kujadili muswada wa sheria ya vyombo vya habari kujiunga na shirika la utangazaji Tanzania(TBC) kila ifikapo saa mbili usiku kuonyesha taarifa ya habari wadau mbalimbali wa habari jijni Arusha wametoa maoni kuhusu jambo hilo.

Mmoja wa wadau hao ni mwandishi wa habari na pia mtangazaji wa Radio ya Arusha One fm ya jijini hapa Amos Thomas Majaliwa akizungumza na mwandishi wa gazeti hili mapema leo alisema kama bunge litapitisha muswada huo utapelekea kupungua na kukosekana kwa nafasi za ajira kwa watangazaji na maripota wa Televisheni nchini.

Mtangazaji wa kipindi cha Sports Dira ya Arusha one fm Amos Thomas Majaliwa akiwa ofisini

Alifafanua kuwa kama muswada huo utapita ni kwamba wasomaji wa taarifa ya habari kwenye Televisheni zitakazojiunga na Shirika la Utangazaji Tanzania(TBC) watakuwa hawana kazi ya kufanya na pia hata maripota wa walioko mikoani nao pia watakuwa hawana shughuli ya kufanya kwasababu kila kitu kitakuwa kikiandaliwa na wafanyakazi wa shilika la hilo la utangazaji Tanzania . 

Aidha alishauri kuwa kama Serikali inataka  vyombo vya habari nchini kujiunga na Shilika hilo kuonyesha taarifa yao ya habari ni bora wangetafuta kwa muda mwingine tofauti na saa mbili usiku kwani kufanya hivyo ni kutegemea kupata habari za mlengo mmoja.

  “Mimi nahisi kama serikali inataka vyombo vya habari kujiunga na TBC kuonyesha taarifa ya habari bora wangetafuta muda mwingine tofauti na huo wa saa mbili usiku “ alisema Amos.

Kwa upande wake Elifuraha Samboto  ambaye ni makamu mkuu wa chuo cha Uandishi wa habari na Utangazaji Arusha yeye alisema muswada huo wa sheria kama bunge wataupitisha utakandamiza vyombo vya habari vingine na italinda maslahi ya serikali zaidi.

Makamu mkuu wa chuo cha uandishi wa habari na utangazaji Arusha Elifuraha Samboto

Aliongeza kuwa muswada huu  kama bunge litaupitisha kuwa sheria haitakuwa na faida yoyote kwa wamilki wa vyombo vya habari , wanahabari nchini na wananchi kwa ujumla kwani watakuwa wanakosa haki yao ya kupata na kutoa habari kama katiba ya jamuhuri ya muungano inavyoeleza.

Naye Maria Thobias mfanyabiashara katika soko la Kwamorombo jijini hapa ambaye ni mdau wa vyombo vya habari nchini alisema muswada huo wa vyombo vya habari vya televisheni kujiunga na shirika la utangazaji ni bora bunge lisiupitishe kwani kufanya hivyo anahisi watakosa sehemu zakuelezea matatizo yanayowakumba wao kama wafanyabiashara sokoni hapo.