Aliyemtukana Spika kwa simu kizimbani

Spika wa Bunge Anne Makinda

Jeshi la Polisi mkoani Dodoma, limemkamata mkazi wa Chang’ombe mkoani hapa, Noel Mlingwa (25), kwa tuhuma za kumtumia ujumbe mfupi wa matusi kwa njia ya simu, Spika wa Bunge Anne Makinda na Naibu wake, Job Ndugai.

 

Kamanda wa Polisi mkoani Dodoma, David Misime, alitoa taarifa hiyo jana kwenye vyombo vya habari.

 

Alisema mtu huyo alikamatwa Februari 12, mwaka huu, eneo la Shule ya Sekondari ya City  iliyopo Area A, mjini hapa.

 

Bila kutaja matusi yaliyotumwa na mtuhumiwa huyo, Misime alisema, mtuhumiwa huyo alitumia simu yake ya mkononi yenye namba 0763-448556 kutuma ujumbe huo wa matusi.

 

Alisema mtuhumiwa huyo ambaye amekana mashtaka hayo alifikishwa katika Mahakama ya Wilaya ya Dodoma Mjini,  juzi na kesi yake imeahirishwa hadi Machi 21, mwaka huu itakapotajwa tena.

 

Kamanda Misime aliwataka wakazi wa Mkoa wa Dodoma kuacha kutumia simu zao za mkononi kwa kutuma ujumbe wa matusi na vitisho kwa watu wengine. 

 

Alisisitiza kuwa atakayekamatwa kwa tuhuma hizo atafikishwa katika vyombo vya sheria.

 

Kutukanwa kwa viongozi hao wa Bunge, kulifuatia Chama cha Demokrasia na Maendeleo (Chadema), kutangaza namba za Spika na Naibu wake katika mkutano wa hadhara uliofanyika jijini Dar es Salaam ili wawashinikize wajiuzulu.

 

Siku moja baada ya mkutano huo,  chanzo kilicho karibu na Spika Anne Makinda , kilisema jumla ya  simu 200 zilipigwa kwa ajili ya kumtukana.

 

Hali kadhalika katika kipindi hicho jumla ya ujumbe mfupi 400 wa simu za mkononi (SMS), uliokuwa ukimtukana ulipokelewa katika simu zake